På Tørvis var det John Nyborg som tok over etter då 79 år gamle Per Bugge-Næss våren 2005. Det gjekk svært dårleg og allereie i desember same året reiste den engelske representanten for Nyborg frå bygda og hotellet.
Av sognavis.no. Publisert: 30.11.05 MARIFJØRA: Luster kommune og Luster Sparebank stogga tysdag alt ombyggingsarbeid på Tørvis Hotel. Den nye eigaren, John Nyborg blir etterforska av politiet for forsikringssvindel. Luster sparebank og Luster kommune stogga ombyggingsarbeidet på Tørvis hotell då det i går vart kjent at den nye eigaren John Nyborg er under politietterforsking for ein gigantisk forsikringssvindel. Nyborg er ein av hovudmennene bak forsikringsselskapet European Insurance Service (EIA), selskapet som ser ut til å ha lurt tusenvis av forsikringskundar. – Eg reagerte med sjokk og vantru då eg fekk høyra om dette, seier lustraordførar Torodd Urnes til Sogn Avis.
Av Lars Kristian Solem Publisert: 07.03.06 Engelskmenn kjøper Tørvis: MARIFJØRA: Det engelske selskapet Aldenham Commercial Ltd har kjøpt Tørvis Hotell på billigsal. Konkursbuet til Jon Nyborg sitt tidlegare selskap European Insurance Agency AS (EIA) har underteikna salspapira slik at engelskmennene no står som eigarar for det tradisjonsrike hotellet i Marifjøra. Ingen av partane vil ut med kjøpesumen.– Prisen er veldig beskjeden i høve til investeringa på ni millionar kroner som EIA har brukt på Tørvis Invest, seier bustyrar Andreas Christensen.For konkursbuet var det to alternativ. Det eine var å finna ei ny eigar fort eller å gå til oppbod. For bustyret var det vanskeleg å finna ein eigar som kunne ferdigstilla hotellet og driva det vidare. Ukjende eigarar– Mitt klare inntrykk er at dei nye eigarane vil driva hotellet vidare, seier Christensen.For han har det vore eit poeng at svindelsikta Jon Nyborg ikkje er involvert i det utanlandske selskapet.– Me har fått det skriftleg frå kjøparane sin advokat at Jon Nyborg ikkje har noko med dette å gjera.Kven dei nye eigarane er, er det så langt ingen som kan svara på. Sogn Avis har prøvd å koma i kontakt med Aldenham Commersial Ltd sin direktør på telefon utan å lykkast.– Eg veit ikkje kven dei er, seier banksjef Oddstein Haugen i Luster Sparebank.Heller ikkje næringssjef Olav Grov eller den norske advokaten som representerer det nye eigarselskapet Aldenham Commercial Ltd veit noko om identiteten til dei som står bak.– Eg veit lite om kva som er planen til dei nye eigarane. Det som er viktig for Luster kommune og Luster Sparebank er at det kjem inn ein eigar som stiller med ny eigenkapital, seier Olav Grov.Banken og kommunen har gått inn med lån og tilskot til Tørvis Invest. Dette engasjementet vert vidareført sjølv om selskapet har fått nye eigarar.Luster kommune sin advokat Bjørn Getz har vore dei nye eigarane sin juridiske rådgjevar.– Dette er eit selskap med adresse i London. Så langt eg veit, er det fire engelske eigarar, men eg er usikker på kven som står bak, seier Getz.– Eg går ut frå at dei har som mål å gjera oppussinga ferdig og driva hotellet vidare. Det er ein føresetnad at selskapet får hjelp til finansiering av Luster kommune, Luster Sparebank og Innovasjon Norge. Eg håpar dei vil få til god butikkdrift.– Det er ikkje fare for at Tørvis blir eit reint spekulasjonsobjekt?– Det kjenner ikkje eg til. Hadde det vore mogleg for buet å få meir av andre, så hadde dei sikkert gjort det. Men her følgjer det og med forpliktingar, seier advokaten til Luster kommune og dei nye eigarane.
Av Jan Inge Fardal Publisert: 01.04.06 MARIFJØRA: Tørvis Hotel blir engelsk frå kjellar til loft. Barry Haller held fram som direktør for dei nye eigarane, dei britiske brørne og forretningsmennene Nick og Dominic Ingram og selskapet Aldenham Comercial Ltd. Det skal investerast 15 millionar kroner før hotellet opnar att med fire stjerner og 45 rom neste sommar. Etter ein tøff vinter då den førre eigaren John Nyborg vart svindelsikta i november, har det gått unna i kulissane bak Tørvis Hotel dei siste to-tre vekene. Torsdag fall dei siste brikkene på plass. Då underteikna brørne Dominic og Nick Ingram avtalen med Luster Sparebank, Luster kommune og Innovasjon Noreg som gjer dei til nye hotelleigarar i Marifjøra. Selskapet til brørne, Aldenham Comercial, har kontoradresse i London og driv med eigedom og drift av pubar og restaurantar i England og Wales. Dei vil ikkje ut med kor mykje dei har betalt for hotellet. Etter det Sogn Avis har grunn til å tru har dei nye eigarane kjøpt aksjane for ein forholdsvis rimeleg penge, men dei tek òg over den gjelda som er opparbeidd etter at Nyborg tok over. Ingen kontakt: Dei britiske brørne fortel at dei først fekk vita om hotellet ved Sognefjorden for vel tre veker sidan. - Før det hadde me verken høyrt om hotellet i Sogn eller om Barry Haller, seier Dominic. Barry Haller er hotelldirektøren som skulle driva hotellet for John Nyborg og som har hatt ansvaret for drifta i hele vinter. Dei nye eigarane fann raskt ut at Haller og hans fru, Maureen, også ho engelsk, bør halda fram som hovudansvarlege for den daglege drifta.- Men me kjem til å vera her fleire dagar kvar einaste månad utover, seier brørne Ingram. Haller er glad for at nye eigarar endeleg er på plass og svarar benektande på vårt spørsmål om den tidlegare eigaren Nyborg har vore involvert i denne prosessen.- Det har det ikkje vore kontakt i det heile, seier Haller. Svært konstruktivt: Brørne Ingram er svært godt nøgde med den mottakinga dei og Haller har fått i Luster.- Dette hadde aldri skjedd i England, berre så det er sagt, seier Nick Ingram. Han snakkar om måten som Luster Sparebank, Luster kommune og Innovasjon Noreg har stilt opp på i forkant av overtakinga. – Dei møtte oss på ein så konstruktiv, positiv og open måte at eg er heilt overvelda. Dette har gjort oss svært entusiastiske og forventningsfulle til kva me kan få til med dette hotellet, seier Dominic Ingram. Brørne Ingram kom til Sogn for første gong denne veka og hevdar at dei aldri har sett noko vakrare.- Men korleis kom de over dette hotellet i London?- Me fekk høyra om det av ein felles kjenning og meinte straks at dette kunne vera eit interessant investeringsobjekt. Sjølvsagt gjer me dette for å tena pengar, understrekar brørne. Dei fortel at det er lange tradisjonar i familien når det gjeld drift av pubar og restaurantar. -Me er 4. generasjon i bransjen. 15 millionarIfølgje Ingram skal det investerast 15 millionar kroner for å løfta Tørvis til eit 4. stjernes hotell med 45 rom. Etter det SA forstår skal dei nye eigarane skyta inn 5 mill. medan den finansieringspakka som Nyborg fekk på plass blir vidareført. Dette betyr at Luster Sparebank gir eit lån på 6 mill, og at Tørvis får 2 mill. i lån frå høvesvis Luster kommune sitt næringsfond og Innovasjon Noreg. Dessutan er det sett av 1 mill. til marknadsføring. Her bidreg kommunen og Innovasjon Noreg med 250.000 kvar dersom det nye eigarselskapet legg 500.000 på bordet. Barry Haller opplyser at hotellet skal opna dørene til sommarsesongen 2007.- Me kjem til å satsa mykje på den lokale marknaden. Hotellet skal vera ope året rundt, med unnatak frå januar og februar, og me skal freista å føra dei gamle, gode mattradisjonane ved dette hotellet vidare, seier Barry Haller.
Av Birthe Johanne F. Finstad Publisert: 14.06.06 MARIFJØRA: Ingen veit kva som skjer med restaureringa av Tørvis Hotell. Naboane etterlyser informasjon, ordføraren meiner situasjonenen er uakseptabel og næringssjefen har lita tru på nyopning sommaren 2007. Enno har ikkje dei nye eigarane, engelskmennene Dominic og Nick Ingram, starta arbeidet med det tradisjonsrike hotellet. Dette trass i at dei tidlegare har sagt at det skal stå klart til å ta imot gjester neste sommar. No reagerer naboane, som meiner hotellområdet ser ut som ei krigssone.Enkelte naboar har kontakta Sogn Avis og fortel at det ikkje er gjort noko med Tørvis Hotell sidan arbeidet stoppa opp i vinter. Området er heller ikkje rydda, og rundt hotellet flyt det av gamalt og nytt materiale. Og så lenge det gamle ikkje blir fjerna og det nye heller ikkje blir teke i bruk, er det ikkje noko vakkert syn som møter naboar og besøkjande i Marifjøra.Lite realistiskBrørne Dominic og Nick Ingram tok over som eigarar av Tørvis Hotell i mars i år, etter at den tidlegare eigaren, John Nyborg, vart svindelsikta i november 2005. Då Sogn Avis snakka med dei nye eigarane og direktør Barry Haller etter overtakinga, var bodskapen at det skulle investerast 15 millionar for å setja hotellet i stand til eit fire stjerners hotell, som etter planen skal opna neste sommar. Næringssjef i Luster kommune Olav Grov har ikkje tru på at denne tidsplanen er realistisk.– Eg har aldri trudd det har vore mogleg med ei nyopning sommaren 2007, alt byggjearbeidet inne står att. Ein er midt i ein byggjeprosess, seier Grov. Det er denne prosessen hotellet sine naboar etterlyserer framgang i og informasjon om, då det dei siste månadene har vore stilt rundt Tørvis hotell. Etter planen skal kommunen sitt næringsfond gå inn med eit lån på to millionar til restaureringa av hotellet, men desse pengane er enno ikkje frigjorde. Vilkåra kommunen har sett til dei nye eigarane er per i dag ikkje oppfylte. Heller ikkje Oddstein Haugen, banksjef i Luster Sparebank, som etter planen skal gå inn med eit lån på seks millionar, har noko nytt å fortelja om dei engelske hotelleigarane.Ordførar i Luster Torodd Urnes er òg uvitande om framdrifta i oppussinga av det gamle hotellet, og meiner situasjonen slik han er no ikkje er akseptabel. – Det er ikkje kjekt å ha noko slike ståande over lengre tid, det er som naboane påpeikar ikkje noko fint syn, og det burde i det minste ha vore rydda utanfor hotellet, seier Urnes. Han utelukkar ikkje at kommunen sjølv kan rydda opp, men først må det koma til ei avklaring med eigarane, som oppheld seg i England. Kontakten med kommunen går føre seg på e-post- og det er lenge sidan det har vore noko møte med brørne Ingram. Ordføraren var nøgd med kjøpet av Tørvis Hotell i vinter og håpte dei nye eigarane ville følgja opp, men no tykkjer han det ser dårleg ut.– Det må setjast ein frist, det ser ut som det kan vera einaste måten å få noko framdrift på, og det bør koma ei avklaring i løpet av sommaren, meiner han. Noko meir konkrete planar har han ikkje, og dermed heller ikkje noko forklaring eller informasjon til dei undrande naboane. Men ordføraren er samd i at det tradisjonsrike hotellet for tida er eit trasig syn.
Av Jan Inge Fardal Publisert: 23.08.06 MARIFJØRA: Tolmodet med dei nye engelske eigarane av Tørvis Hotell er i ferd med å renna ut. Kreditorane, med meir enn fire millionar kroner til gode for ombyggingsarbeidet, har starta prosessen mot eit tvangssal av det tradisjonsrike hotellet. Kreditorane sin advokat, Olve Grotle, presiserer at dei enno ikkje har skrinlagt alt håp om at dei engelske eigarane, brørne Dominic og Nick Ingram, klarar å finansiera sin del av ombygginga av hotellet. Det vil i so fall opna for eit lån på seks millionar frå Luster Sparebank, som framleis står urørt i banken.Men Grotle legg ikkje skjul på at håpet blir tunnare for kvar dag som går, for kvar garanti eller lovnad som ikkje blir oppfylt av dei engelske eigarane.– Seinast for 14 dagar sidan fekk eg klare signal om at noko var i ferd med å skje. Men ingenting har skjedd enno, og difor har eg varsla namsmannen om å iverksetja nødvendige førebuingar for eit tvangssal, seier Grotle.Dette er ein prosess som uansett vil ta tid, truleg fleire månader. Med andre ord kan truleg eit eventuelt tvangssal av Tørvis først gjennomførast rundt juletider. Må seljaGrotle, som framleis vil tru det aller beste om hotellgründerane i England, har via deira norske advokat fått opplyst at selskapet slit med å finansiera hotellovertakinga. Dei må først selja eigedommar i heimlandet noko som visstnok skal vera mykje vanskelegare enn brørne Ingram trudde då dei overtok Tørvis i vinter. – Eg har ingen grunn til å tvila på at det dei hevdar er korrekt, men som sagt når det går så lang tid utan at noko skjer, hadde kreditorane eigentleg ikkje noko val. Så får me sjå om det verkeleg hender noko med hotellet før det er klart for eit tvangssal, seier Grotle.Dei lokale kreditorane, med Kjos Bygg i spissen, har til saman vel fire millionar kroner til gode for arbeid dei har utført med ombygging av hotellet. Førebels har kreditorane ikkje vore inne på tanken om å slå det nye selskapet konkurs. – Det er førebels uaktuelt å gå til skifteretten, seier Olve Grotle. UheldigKreditorane sin advokat har ingen vanskar med å forstå at både naboar, kommune og sparebanken reagerer på den totale mangel på framdrift for dette prosjektet.– Dette er sjølvsagt uheldig for alle partar. Naboane ynskjer at alt bli ryddig att, kommunen ynskjer aktivitet og treng hotell og kreditorane må få pengane dei har til gode, seier Grotle, som vonar alt løyser seg snart og før eit tvangssal blir nødvendig.Ordførar Torodd Urnes legg ikkje skjul på at han mislikar denne situasjonen meir for kvar dag som går.– Diverre har engelskmennene så langt stort sett berre lova og loge. Dette er ei svært uheldig sak for oss, og eg vonar no at engelskmennene snart gjer noko av det dei har lova, seier ordføraren.Han meiner det er reell grunn til å frykta at hotellet hamnar i skifteretten.Banksjef Oddstein Haugen er heller ikkje spesielt imponert over framdrifta på Tørvis, men han presiserer at Luster Sparebank ikkje har noko uteståande. Banken har gjeve tilsegn om eit lån på seks millionar kroner til selskapet til brørne Ingram. Men dette lånet er på klare vilkår og står førebels uopna.
Av Birthe Johanne F. Finstad Publisert: 09.06.09 Etter å ha vore ute av drift dei siste åra, er endeleg gamle Tørvis Hotell i Marifjøra oppe og går att. Laurdag 6. juni 2009 var det offisiell opning av hotellet, som no har fått namnet Tørvis Bre-, Ski- og Fjordhotell. På plass var sjølvsagt eigar, dagleg leiar, ordførar og mange som hadde teke turen for å få med seg hendinga. Av Sogn Avis Publisert: 27.10.11 Raude tal for Wikborg: Sidan han kjøpte Tørvis hotell vinteren 2008, har investor Rolf Wikborg bygd seg opp med ein portefølje på åtte reiselivsverksemder i nærområdet til Indre Sogn Travel Property Holding as Eigd av Ama Norway as, som er eit selskap heileigd av Rolf A. Wikborg. Administrerande direktør og styreleiar: Rolf Wikborg. Årsresultat 2010: ÷ 18.000 kroner Årsresultat 2009: ÷ 25.000 kroner Tørvis Eiendom as Eigd av Travel Property Holding as (97,22 prosent). Administrerande direktør: Gunnar Nedrum Aagaard Styreleiar: Rolf Wikborg. Årsresultat 2010: ÷ 3.265.000 kroner Årsresultat 2009: ÷ 1.760.000 kroner Tørvis bre-, ski- og fjord-hotel as Eigd av Tørvis Eiendom as (95 prosent) og Bård Huseby (fem prosent). Administrerande direktør: Bård Huseby Styreleiar: Rolf Wikborg. Årsresultat 2010: ÷ 810.000 kroner Årsresultat 2009: + 34.000 kroner MS Turnus as Eigd av Tørvis Eiendom as. Administrerande direktør: Bård Huseby, Styreleiar: Rolf Wikborg. Årsresultat 2010: ÷ 108.000 kroner Årsresultat 2009: ÷ 24.000 kroner Mountainfjord as Eigd av Tørvis Eiendom as Administrerande direktør: Gunnar Nedrum Aagaard, styreleiar: Rolf Wikborg. Årsresultat 2010: ÷ 20.000 kroner Årsresultat 2009: ÷ 30.000 kroner Bøyum pensjonat kafé og kunst Balestrand as Eigd av Travel Property Holding as. Administrerande direktør: Gunnar Nedrum Aagaard Styreleiar: Rolf Wikborg. Årsresultat 2010: ÷ 123.000 kroner Årsresultat 2009: ÷ 45.000 kroner Hotel Mundal as Eigd av Hilde Mauritzen (50 prosent) og Travel Property Holding as (50 prosent) Administrerande direktør: Bård Huseby, Styreleiar: Rolf Wikborg. Årsresultat 2010: + 424.000 kroner Årsresultat 2009: ÷ 157.000 kroner Nigardsbreen gjesteheim as Eigd av: Travel Property Holding (50 prosent), Frank Optun Smedegård (25 prosent) og Ringstind as (25 prosent). Administrerande direktør: Gunnar Nedrum Aagaard Styreleiar: Rolf Wikborg. Årsresultat for 2010 er ikkje klart Årsresultat 2009: ÷ 506.000 kroner Kjelde: purehelp.no
Av Jan Inge Fardal Publisert: 27.10.11 Både administrerande direktør for Mountainfjord as, Gunnar Nerdrum Aagaard og direktør på Tørvis hotell, Bård Huseby har sagt på stillingane sine. Styreleiar Rolf Wikborg må setja saman ei ny leiing for å føra storsatsinga si i Sogn vidare. – Eg leverte mi oppseiing den 19. oktober, seier mannen som har leia Mountainfjord as det siste året, Gunnar Nerdrum Aagaard til Sogn Avis. Dei siste dagane ha det gått mange rykte om at både han og sjefen på Tørvis hotell, Bård Huseby, var i ferd med å slutta. No har Sogn Avis fått stadfesta at begge har sagt opp. Utfordringar – Det stemmer det, eg har sagt opp stillinga mi på Tørvis, seier Bård Huseby. Dette skaper store utfordringar for Rolf Wikborg i Travel Property Holding as, som er morselskapet for satsinga i Sogn. Gunnar Nerdrum Aagaard har vore administrerande direktør både i Tørvis Eiendom as, Mountainfjord as, Tørvis Eiendom as, Bøyum pensjonat kafé og kunst i Balestrand, og for Nigardsbreen gjesteheim as. Bård Huseby, som også eig fem prosent av aksjane i Tørvis hotel, har vore tilsett som direktør for Tørvis, MS Turnus as, og for Hotel Mundal as. Les òg: Raude tal for Wikborg Verken Gunnar Nerdrum Aagaard eller Bård Huseby ynskjer å gå i detaljar om kvifor begge sluttar no – og på same tid. Heller ikkje at også ein tredje nøkkelfigur i selskapa til Rolf Wikborg, Fredrik Bredvatnet på Gordon har sagt opp. Rask vekst Hotellkjeda MountainFjord har det siste halvåret satsa på ein rask vekst i heile distriktet. Dei har overteke drifta av Findebotten Gjestehus i Finnabotn, Nigardsbreen Gjesteheim i Jostedalen og Gordon Gjestetun på Reed i Nordfjord. Frå før hadde dei mellom anna Tørvis og Mundal som sine flaggskip. Dei skal også overta det brannråka Hopstock hotell i Vik.I april sa Gunnar Nerdrum Aagaard dette til Sogn Avis : «I løpet av kort tid skal me byggja opp ein heilt ny aktør innan overnatting- og opplevingsturisme, og me vil garantert ha basen vår i Sogn. Kvar hovudkontoret skal leggjast, har me enda ikkje heilt avklart». Eit halvt år seinare er han ikkje lenger med på satsinga. Heller ikkje frontfiguren Bård Huseby.
Av Jan Inge Fardal Publisert: 28.10.11 Rolf Wikborg avviser alle spekulasjonar om at Mountainfjord as skal vera i ferd med å rakna. Tvert imot – han satsar meir enn nokon gong og har nyss investert i nok eit historisk reiselivsobjekt i Sogn og Fjordane. Men først skal alle kreditorar i Sogn få oppgjer. Unødvendig uvisse Torsdag fortalde Sogn Avis at både Tørvis-direktør Bård Huseby og direktøren for Mountainfjord as, Gunnar Nerdrum Aagaard har sagt opp stillingane sine. – Det stemmer jo, det, men det var likevel langt over mål å slå fast at desse oppseiingane betyr at Mountainfjord as er i ferd med å rakna, seier Rolf Wikborg. Han legg ikkje skjul på at han mislikte tittelen i dette oppslaget sterkt. Først og fremst fordi han meiner det skapte unødvendig uvisse rundt framtida til prosjekta i regionen. Store planar – Det er ingen tankar om å redusera satsinga på Mountainfjord as. Heller tvert imot. Me har store planar og forventningar til satsinga vår i Sogn og Fjordane, men me må over i ein ny fase no, seier Wikborg. Etter at dei to toppsjefane sa opp, har han og kona Mette bestemt seg for å ta ansvar for den daglege leiinga av Mountainfjord as, Tørvis hotell og for dei andre prosjekta i regionen. – Og berre så det er slått fast med ein gong, det blir normal drift ved Tørvis Hotell framover. Me vurderte ei kort stund å vinterstengja hotellet frå 1. november, men det blir ikkje aktuelt. Julebordsesongen går som planlagt, seier reiselivsgründeren. Mista oversikta– Det har gått mange rykte om selskapa dine dei siste vekene. Spesielt i Luster, der det har vore snakka om både inkassokrav og konkurs. Kva seier du til dette? – Dette med hotelldrift har vore ein smertefull bratt læringskuve for oss. Det er shipping eg kan, hotell er noko eg framleis lærar. Me har vokse fort og undervegs har me diverre ikkje vore flinke nok til å ha ein total oversikt. Eg vart overraska då eg fann ut kor mykje uteståande me eigentleg hadde. Nokre av våre samarbeidspartnarar har lidd av dette, og det beklagar eg. Men me skal rydda opp i alle desse tinga straks. Me har aldri gått frå ei rekning og kjem heller aldri til å gjera det. Alle skal få alt dei har til gode så raskt som mogeleg. Sjølv om det har vore tungt å oppleva dette, tykkjer Wilborg at det også har vore ein slags renselsesprosess. – Den første tida, då alt var fryd og gaman og me investerte og investerte, var alle på lag med oss. No veit me betre kven me kan rekna med i framtida, kven som er der også i motgang. Ny rekneskapsførar Det er no tilsett ein rekneskapsførar som saman med ekteparet Wikborg skal få skikkeleg orden på alle sider av drifta i Sogn. – Vår fremste oppgåve blir å koordinera dei ulike elementa. Me skal skapa ein heilskap av alt dette. Men først skal me altså rydda skikkeleg opp. Læringskurven har som sagt vore bratt, smertefull bratt. Og me har vore naive – veldig naive- i satsinga vår, innser shippinginvestoren, med bakgrunn frå ein heilt annan forretningsjungel enn den han har møtt i Sogn. – Men same kva, må eg få streka under at me har fått ei usedvanleg god mottaking i Sogn. Og sjølv om eg dei siste vekene har fått meg nokre skikkelege tankevekkjarar, er det framleis slik at 90 prosent framleis er positive. Dei siste 10 prosentane som har skuffa, skal me nok klara å leva godt utan, seier shippingmillionæren, som framleis har kontor på toppen av Chrysler-bygningen i New York. Stor tru på Vik – Kva no med Vik og planane for Hopstock hotell? – Lokalmarknaden i Vik er kjempespennande og fortener å få att hotellet sitt. Det er eit oppegåande lokalsamfunn med ei proaktiv politisk og administrativ leiing. Akkurat som Olav Grov i Luster, som var total instrumental for å få oss inn i Tørvis, har vikjene – med Carl André Riiber i spissen, fått oss til å tenna. Wikborg dreg fram stavkyrkja, mellomalderkyrkja, vikinggravene og kulturstien som heilt unik. Han snakkar også varmt lakseelva, småbåthamna og dei vidare planane om sjønær aktivitet, han tykkjer idrettsanlegget er imponerande og så er han sikker på at det kjem tunnel gjennom fjellet. Etter å ha vore busett i USA i 16 år har han ekstra sans for det gamle motellet til Hopstock, som han ynskjer å byggja ut på skikkeleg amerikansk vis. – Vik har så spanande og samansette tilbod at eg gler meg til vera med og gjera alt dette meir tilgjengelege for tilreisande frå alle kantar av kloden, seier Rolf Wikborg.
Av Renate Sæle Publisert: 01.11.11 Rolf Wikborg forsikrar om vidare satsing på hotell og opplevingar i Sogn. Rolf Wikborg, mannen bak hotellkjeda MountainFjord, møtte lustringane på heimebane under eit næringsseminar i regi av kommunen, Luster sparebank og Høgskulen i Sogn og Fjordane tysdag. Wikborg, med bakgrunn frå shipping, forsikra at han ikkje gir opp storsatsinga si på hotelldrift i fylket, trass i ubetalte rekningar og raude tal. – Eg er litt lei shipping. Utfordringa no er å få dette til, og me skal tena pengar på det, sjølv om den eine etter den andre har slutta, forsikra Wikborg. Fornying Sogn Avis har tidlegare skrive om at fleire nøkkelpersonar ved Tørvis Hotell og kjeda MountainFjord har slutta. Men Wikborg satsar vidare og tek over styringa sjølv. – Det har vore behov for fornying. No har me eit regimeskifte der det er litt tøft. Og hotellvisjonæren forsikra at kreditorane skal få betalt. – Me går ikkje konkurs, var hans bodskap. – Fancy bil Han set pris på oppbacking i lokalmijøet og fortel at Tøvis hotell ikje hadde overlevd utan lokal støtte. Likevel innrømmer han at møte med Sogn og hotellbransjen har vore krevjande. – Det nytta ikkje å koma her med pengar, dress og fancy bil. Eg er nok i blant blitt misforstått, trur han. Lokale aktivitetar Han ser med positive auge på etablering av Luster bad og utvikling av Heggmyrane. – Me må tenka lenger enn å opna eit hotell. Han gjer det klart at Munthehuset på sørsida av Lustrafjorden har potensiale som overnattingsstad knytt til besøk i Urnes stavkyrkje. Bøyum pensjonat i Balestrand kjøpte han på krita og også her ser han potensiale i å utvikla eit slitent, gammalt hotellbygg. – Dei fleste stadene me har teke over har vore den grimme Elling, seier han. Har tillit Luster kommune har vore rause med bidrag og lån til etableringa av Tørvis hotell. Næringssjef Olav Grov har framleis trua på Wikborg og planane hans. – For oss gjer Rolf Wikborg viktige investeringar i Luster. Eg trur og håper dette går bra, seier næringssjef Olav Grov.
Av Jan Inge Fardal Publisert: 28.02.12 Han gjekk den viktigaste læretida si hjå Olav Thon. No skal bergensaren Vegar Kversøy (39) få skikkeleg fart på Tørvis hotel. - Eg har sogneblod i årene altså – ikkje mykje, og heilt frå Gulen i Ytre Sogn, men det betyr vel litt, seier Vegar Kversøy og ler. Og avslører at han frå dag 1 har fått med seg at det er viktig med røter, lokal kunnskap og kontakt når du skal driva hotell i Sogn. Mountainfjord-gründer Rolf Wikborg er svært glad over å ha fått tak i Kversøy. – Eg er så sikker eg kan bli på at me har fått rett mann på rett plass, seier Wikborg. Han opnar flaggskipet i si Mountainfjord-kjede, med ny sjef, allereie førstkomande helg. Letta eigar Etter at Bård Huseby slutta på Tørvis i fjor, har ekteparet Rolf og Mette Wikborg teke ansvaret. Wikborg har aldri lagt skjul på at dei ikkje kan nok om hotelldrift sjølve til at det kan bli permanent, og at dei soleis har vore på jakt etter ny sjef på Tørvis heilt sidan Huseby slutta. – Via ein felles kjenning fekk me høyra om Vegar. Det me høyrde om bakgrunnen hans, og om han store engasjement for faget gjorde at me ville ha han til Tørvis. Det betydde også ein del at han kom ifrå eit så veldrive selskap som? Olav Thon. Der er det kontrollrutinar og solid drift. Me har hatt visse utfordringar her på huset, men alt er no skværa opp og me er klare til å gå å vidare, seier Rolf Wikborg.
Av Renate Sæle Publisert: 24.09.12 Tørvis hotel vart utsette for skimming i Gaupne. I eit brev sendt ut til leveradørar orsakar Tørvis Bre, -Ski og Fjordhotell at dei ligg etter med betaling og har likviditetsproblem. Ein av grunnane til dette er at dei vart utsette for skimming frå bankkontoen i Luster sparebank måndag. Sperra 350.000 – Me hadde 350.000 på denne kontoen. Den vart då frosen, seier eigar Rolf Wikborg til Sogn Avis. I brevet til leverandørane er formuleringa noko annleis. Her går det fram at det var innbrot i den lokale minibanken i Gaupne måndag kveld, visakortet til Tørvis vart brukt i denne bankautomaten tidlegare på kvelden og kontoen tømt. Men dette stemmer ikkje. Banksjef Oddstein Haugen stadfester at det ikkje har vore innbrot i banken. Skuldar pengar – Innbrot har det ikkje vore. Men kortet vart brukt på bensinstasjonen som vart skimma, vedgår Wikborg. – Me visste ikkje kva som hadde skjedd, men me fekk frose midlane, seier han og dermed valde å senda leverandørane eit brev. I brevet går det fram at eigarane av hotellet har vore i tvil om dei skulle fortelja leverandørane om kva som eigentleg har skjedd sidan. Hotellet skriv at dei no opplever likviditetspress og «vi skulle ha kontaktet dere om dette mye før, men vi har trodd det skulle løse seg raskere enn det har gjort», heiter det i brevet signert Mette A. Wikborg, kona til Rolf Wikborg. –Bruk regionsperre – Skimming skjer oftare og oftare, seier banksjef Oddstein Haugen. – Me har kundar som blir utsette for dette rett som det er. Grunnen til at me melde dette til politiet er at det har ikkje skjedd i kommunen vår før, seier Haugen, banksjef i Luster sparebank. Han understrekar at det ikkje er snakk om innbrot i banken. Kopierer info Ifølje Wikipedia føregår skimming vanlegvis i minibankar ved at svindlarar festar ein liten kortlesar som kopierer kortinformasjon over kortlesaren i minibanken. Dette kan vera svært vanskeleg å oppdaga. Det er også vanleg at svindlarane monterer eit kamera over tastaturet for å filma inntasting av pin-koden. Han oppmodar folk om å nytta regionsperre på bankkorta. Dette kan gjerast i nettbanken. Slik kan ein enkelt syta for at korta ikkje blir misbrukt i dei områda av verda du har sperra korta for.
Av Jan Inge Fardal Terje Eggum Halvor Farsund Storvik Publisert: 13.10.12 Tørvis hotell er igjen utan direktør. Vegar Kversøy gjekk på dagen etter sju månader. I går sende han konkursbegjæring mot hotellet, med von om å endeleg få betalt ut løn. I sju månader har Vegar Kversøy stått på for Tørvis hotell utan at han har fått ei einaste, ordinær lønsutbetaling. Han har også opplevd at han gong på gong har vore nøydd til å skuffa lokale kreditorar, som ikkje har fått oppgjer. Ved ei rekke tilfelle har han betalt rekningar med sine eige sparepengar. – Eg orka rett og slett ikkje å bortforklara til kreditorane fleire gonger. Det skjedde så mange gonger. Det var utruleg slitsamt at hotellet aldri kunne eller ville gjera opp med dei mange små, lokale kreditorane, seier Kversøy. Les også: – Nei, me er ikkje konkursLamslegen – Eg er rett og slett lamslegen over det eg har opplevd på Tørvis, seier ein nedbroten og utsliten eks-direktør. Han vart henta av Rolf Wikborg i januar og frå 1. mars var han på plass i Marifjøra for å få Tørvis på beina. Sju månader seinare seier han at han har mellom 300.000 og 350.000 kroner til gode i løn hjå Wikborg. Kversøy overtok Tørvis etter at forrige direktør sa opp i fjor haust.Lovar Tørvis friske pengar Hotelleigar Rolf Wikborg stengjer ikkje Tørvis om folk seier opp. – Kvifor hamna hotellet i denne situasjonen? – Saka har fleire sider, av omsyn til alle partar ynskjer eg ikkje kommentera dette, seier Wikborg. – Men her klager mange på at dei har uteståande pengar hjå deg? – Me har dårlegare likviditet enn me hadde gjort rekning med, eit etterspel frå starten tyngjer oss mykje, det har vore utfordrande å koma à jour med dette, seier hotelleigaren, og seier at ny eigenkapital er på veg. Lovar rydda opp Rolf Wikborg har denne kommentaren til ei eventuell konkursbegjæring: – Det er ukjent for meg, men det blir i tilfelle ein formell prosess der resultatet ikkje er gjeve, elles er det berre å seia at det skal ryddast opp på ein fair måte med Vegar, seier han. – Du har ein del uteståande i lokalsamfunnet? – Ja, eg har mange kreditorar det skal ordnast opp med, eg er i kontakt med dei fleste, me gjer det me kan, eg vonar det kan bli ei ordning før jul. Ny skjenkeleiar Sidan Vegar Kversøy gav seg som hotelldirektør, har Tørvis mangla ein skjenkeleiar. Men her tek Knut-Arne Bredal-Thorsen ved Hotel Mundal i Fjærland, som Wikborg også eig, over ansvaret. Og Luster kommune kjem ikkje til stikka kjeppar i hjula. – Det kjem kommunen til å godta, for han har alle naudsynte kvalifikasjonar, inkludert skjenkeprøve, seier Jarle Skartun, rådmann i Luster Kommune.
Av Sigrid Svartefoss Publisert: 15.10.12 Vegar Kversøy trekkjer konkurskravet mot Tørvis - i ei veke. ?- Rolf Wikborg kom heim til meg med eit foreldrepar som med tårer i augo fortalde at ein av deira største dagar i livet deira stod i fare. Eg lova difor å utsetja konkurskravet så bryllaupet kan gå som planlagt på Tørvis, fortel Kversøy. Tårer avgjorde Sogn Avis skreiv laurdag om Tørvis-direktøren som gjekk på dagen, fordi hotelleigaren handsama både tilsette og kreditorar utruleg dårleg. Bergensaren har ikkje har fått løn i dei sju månadene hadde har stått på for å få økonomien og hotelldrifta på fote. – Kvifor let du deg då overtala til ikkje å senda konkurskravet? – Eg trudde ikkje mine eigne auge då eg såg Wikborg. Han tek med seg eit foreldrepar heim til meg og tårer renn. Eg greidde berre ikkje seia nei, fortel den tidlegare hotelldirektøren då Sogn Avis møter han i helga. Angrar inderleg Kversøy fortel om ei tung tid, og tolmodet hans brast den dagen han skulle ta ut løn som han av god vilje og hjartevarme for eit flott hotell, hadde late stå som ei tryggleik for hotellet sin bankkonto. – For å vera ærleg så kan eg ikkje forstå korleis hotelldrifta kan halda fram, men eg håpar dei lokale kreditorane kjem betre ut enn meg. Eg angra på at eg har brukt sju månader av livet mitt på Tørvis. – Wikborg har budd mange år i USA. Er det den amerikanske haldninga han har teke med seg til Marifjøra når det gjeld måten han går fram på? – Eg har sjølv budd i USA i ein lengre periode, og dei kan ikkje driva slik Wikborg gjer. Ein kan oppføra seg nokon stad slik som han har gjort på Tørvis i desse åra. Spekulativt og kynisk, vil eg kalla handlemåten.
Av Terje Eggum Publisert: 22.10.12 -Me er ved ein krossveg, seier Rolf Wikborg, og vedgår at det er tungt å vera ein gjeldspressa hotelleigar. Aller mest tyngjer oppslaga i media. Han meiner ingen kan vera upåverka av, som han seier, å bli hengt ut som kjeltring på regionavisa si 1. side. – Eg blir frustrert og fortvila når Sogn Avis framstiller meg som ein kynisk finansmann. Motivasjonen – Men kva er du? – Eg er ein ærleg og redeleg, men uerfaren, aktør i reiselivet, intensjonen min er å lukkast med det eg driv med, seier Rolf Wikborg, og let oss forstå at familien sin motivasjon er sett på hard prøve den siste tida. Mista lysten – Me drøftar no innover i familien om dette er noko me vil halda fram med, problemstillinga er påskunda i det siste, med uthenging på avisa si 1. side. – Kva blir utfallet? – Me veit ikkje det enno, seier han, og inkluderer Mette, kona si, som gruar seg for å koma til Sogn att og som etter stormen dei siste dagane strir med å halda oppe entusiasmen for hotelleventyret i Sogn. – Me blir dømde nord og ned og sett på som dårlege menneske, slikt kan ein mista lysten av. Uoppgjort Gjennom media har det kome fram at Rolf Wikborg har ein del uteståande gjeld i nærområdet sitt. I Sogn Avis har tilsette ved Tørvis i Marifjøra stått fram og kritisert sider ved arbeidsforholdet, samt at regulær løn til hotellsjefen har uteblitt over tid. Dei hardaste utfalla har kome frå sistnemnde, Vegar Kversøy, som inntil nyss var dagleg leiar ved hotellet. – Vegar var ikkje rette mannen, seier Rolf Wikborg, og gjentek at den saka har to sider. Han nøyer seg likevel med å seia dette: – Me har ei uoppgjord sak med Vegar, dei andre tilsette har fått løn og vore veldig flinke. Tolmodige Rolf Wikborg prøver å forstå kvifor den negative goodwillen har tårna seg opp rundt han. Han seier avisa må ta ein god del av skulda. – Kva med dei mange små næringsdrivande i regionen som har pengar til gode i systemet ditt? – Dei er tolmodige, ja, men me har ein bra dialog med dei, eg trur dei forstår kor vanskeleg me har det, det er faktisk heller ikkje så mykje uteståande som mange vil ha det til. – Men du trekkjer på tolmodet til kreditorane? – Ja, og det er slitsamt, mest for dei, men også for meg, me har i desse 4–5 åra brukt lokal arbeidskraft og lokale leverandørar, så langt er det ingen som ikkje har fått pengane sine til slutt. Eg har vore for optimistisk, men dette er då også ein ekstremt vanskeleg bransje, seier Rolf Wikborg, og forsikrar at han gjer sitt beste for å halda kreditorane informerte om stoda. Skikkeleg kar – Får dei snart oppgjeret sitt? – Ja, det skal dei. – Ser du at eit snarleg oppgjer til fleire små kreditorar kan medverka til å gjera forholdet til media mindre strevsamt? – Ja. – Kva grep gjer du for å retta opp i det? – Det må hentast pengar frå utsida, over drifta er det inga utsikter på kort sikt til å klara det. Godtruande – Representerer du ein ny sort betalingskultur? – Dette er ingen kultur, dette er ikkje «amerikansk», det er kort og godt røyndomen i ein svært utfordrande bransje. Men me har vore godtruande og naive og ikkje skjønt godt nok kva som skal til for å lukkast. Rolf Wikborg vedgår at han i ettertid har reflektert over kva utfordringar som kom uventa på han. Han seier at ein ikkje utan vidare blir god på å driva eit lite hotell om ein måtte vera aldri så flink til å sy i hop finansielle strukturar i internasjonal shipping. – Eg var ikkje trent opp til å ha auge for dei mange små detaljane, seier han.
Av Terje Eggum Publisert: 22.04.13 Tørvis og Marifjøra skal dra betre i hop når den opphavlege hotellfamilien no er på bana att. Syskentrioen Kjell Sindre, Siv Kjersti og Stig Øystein, alle med etternamnet Schmidt, skal driva Tørvis hotell heretter. På lag med bygda Tørvis Bre Ski og Fjordhotell opnar dørene for ny sesong 13. mai, men alt i slutten av april får det nye vertsskapet prøva seg, då veltar det inn ein stor gjeng toppturfolk. – Me vil også bli eit hotell for regionen og bygda, seier Kjell Sindre (29), dagleg leiar, med magistergrad i filosofi. Tette band Han har med seg syster Siv Kjersti (25), som har jobba på Tørvis sidan noverande eigar, Rolf Wikborg, tok over. Veslebror, Stig Øystein (19), også med fartstid ved hotellet, er den tredje på laget. Dei er alle frå Gaupne, den førre eigaren, Per Bugge Næss, er bror til bestefar deira, Kjell Bugge Næss. Dei tre har såleis tette band til Tørvis og Marifjøra. Ta vare på roen Det lokale ankerfestet kjem til å telja mykje for trioen. Det er stor vilje til å styrka den lokale profilen. – Me skal ta ut den kvaliteten som ligg i å vera omgjeve av Marifjøra si ro, og me skal bli eit hotell med eit godt kjøkken, seier Kjell Sindre.
Av Halvor Farsund Storvik Publisert: 21.07.13 Eit nyleg branntilsyn ved Tørvis hotell avdekte fleire avvik. Tilsynsrapporten melder om «ulovlege forhold» og varslar byggjesak til kommunen på grunn av manglar ved enkelte av brannskiljene. Men ifølgje branninspektør Olav Helge Ylvisåker i Sogn brann og redning, er situasjonen ikkje så dramatisk som det kan høyrast ut. – Det er ting som må gjerast noko med, men som ikkje er dramatiske i høve den vidare drifta av hotellet, seier han. Byggjesak Tilsynet skjedde tidlegare denne månaden. I eit brev til Luster kommune, med overskrifta «Melding om ulovlege forhold til bygningsmyndigheitene», ber branninspektør Olav Helge Ylvisåker bygningsvesenet om å vurdera saka. I tilsynsrapporten, som ligg ved brevet til kommunen, kjem det fram at hotellet ikkje har følgt opp enkelte avvik frå tilsynet i 2012, mellom anna manglar det framleis risikoanalyse og instruks. I tillegg kom det fram eit par nye avvik, der det mest iaugefallande er feil ved nokre av brannskiljene ved hotellet. Branninspektøren skriv at tilhøva rundt skiljekonstruksjonane «er av ein slik karakter at me finn det naudsynt å varsla byggjesak». Konkret peikar rapporten på branndører som ikkje er tilfredsstillande tette og at rømmingsvegar ser ut til å vera av brennbart materiale. God dialog Dagleg leiar ved Tørvis hotell, Kjell Sindre Schmidt, seier dei tek innvendingane til branntilsynet på alvor, men er ikkje uroa for konsekvensane for den framtidige drifta av hotellet. – Dette går på ting som vart forsøkt utbetra i fjor, men som tilsynet viste ikkje var godt nok utført. Utover det var branntilsynet nøgd med korleis me har teke tak i tinga, seier Schmidt. Han tok over drifta av hotellet i april i år, saman med to sysken. Den daglege leiaren opplyser at av ni avvik på tilsynet i fjor, var seks av dei heilt ordna og eitt delvis ordna ved inneverande kontroll. Schmidt seier dei allereie har gått i gang med nye tiltak og at eit bruksløyve skal på plass så snart som råd. – Vår tilnærming er å ta tak i dette på ein positiv måte og me har ein god dialog med branntilsynet, seier han.
Av Jan Egil Fimreite Publisert: 15.01.18 Tørvis Eiendom gjekk på eit sviande nederlag i tingretten i søksmålet mot Luster Sparebank og Luster kommune. Tørvis Eiendom AS må ifølgje dommen betala 12.437.819 kroner til Luster Sparebank, i tillegg til renter. Dette i samsvar med låneavtalen frå 15. oktober 2016 til 24. februar 2017 og med tillegg av forseinkingsrente etter forseinkingsrentelova frå 24. februar 2017 til betaling skjer.- Dommen blir anka. Ut over det har eg ingen kommentar, skriv Ola Moe, styreleiar i Tørvis Eiendom, i ein e-post til Sogn Avis. FRÅ RETTSAKA: Bak dommar Harald Hjermann, Stein Hegdal, advokaten til kommunen og banken, næringssjef Olav Grov og banksjef Oddstein Haugen. 14 dagar. Tørvis Eiendom har fått 14 dagar på seg til å betala summen frå forkynning av domen.Den same fristen har Tørvis Eiendom når det gjeld betaling til Luster kommune. Dette gjeld hovudstolen på to lån kommunen har gjeve til Tørvis Eiendom på nær fem millionar kroner. Sanering av gjeld. Tvisten i retten stod om sanering av gjeld til selskapa bak Tørvi Hotell. Eigar Ola Moe meinte han hadde oppfylt sin del av avtalen med banken, og at dei difor hadde krav på gjeldssanering. Luster sparebank på si side meinte Moe ikkje har halde seg til vilkåra banken sette for refinansiering og ettergjeving av gjeld. Dette fekk altså banken medhald i i tingretten. Part: Luster kommune var også part i retten, med same advokat som banken. Kommunen hadde også fatta vedtak på ettergjeving av gjeld, på vilkår av at banken gjorde det same. Då banken trekte seg, gjorde kommunen det same.Luster sparebank fekk også medhald i retten i sitt krav om tvangssal og tvangsbruk av eigedomen. Tørvis Eiendom AS vart også dømde til å betala sakskostnadene til Luster kommune og Luster sparebank på til saman 750.000 kroner. Krangel; Retten fekk også innsyn i eit samarbeid mellom syskena Siv Kjersti og Kjell Sindre Schmidt og Moe som havarerte då Moe ville at Tørvis Hotell skulle betala kjedeavgift til Pure Hotels, som Moe eig. Advokaten til Moe, Joar Heide, meinte syskena overreagerte, og at slik kjedeavgift var heilt vanleg.Eit vilkår for gjeldssanering var nettopp at syskena Schmidt og Moe skulle gå saman i eit nytt selskap, Marifjøra eigedom, som skulle eiga og driva hotellet. Her skulle dei vera likeverdige partar, og eiga halvparten kvar. Motiv: Heide drog motiva til banken i tvil og meinte dei ynskte å bana veg for Schmidt-syskena når dei kravde hotellet konkurs. Ei oppmoding dei seinare gjekk tilbake på då Moe ved å flytta verdiar fekk betra økonomien i Tørvis Eiendom.Advokat Stein Hegdal for bank og kommune avviste påstandane frå Heide om at banken favoriserte Schmidt-syskena. Han fortalde om uteståande lån både i Tørvis eigedom og Marifjøra eigedom. Vonar punktum er sett: Oddstein Haugen, banksjef i Luster sparebank, vonar domen i tingretten markerer eit punktum i saka.- Me vann fram i med saka. Sjølv om dommen ikkje er rettskraftig, vonar eg på vegner av både banken og kommunen at det no er sett punktum. Men her får den andre parten uttala seg. Gjennomgang: Haugen seier han no vil lesa nøye gjennom dommen og drøfta den med advokaten.- Men eg ser ingen grunntil at me skal gjera noko vidare i saka.Ordførar Ivar Kvalen i Luster er glad og letta over avgjerda i tingretten.- No har eg ikkje fått lese dommen, men eg oppfattar det slik at me har vunne på alle punkt. Det tyder at me har tolka saka rett, seier Kvalen.
Av Wenche Schanke Eikum Publisert: 17.12.18 Ola Moe sel no hotella sine i fylket samla. Det vil sei at både Hotell Mundal i Fjærland, og Tørvis hotell i Marifjøra får ny eigar. Ola Moe sel alle hotella sine i fylket til investor Halstein S. Sjølie i Moss. Truga med riving: Moe kjøpte hotellet i Fjærland i 2014. Då han vart pålagt eigedomsskatt i 2016 truga han med å rive heile hotellet i protest. Han meinte det var urimeleg at han både skulle bruke store summar på å rusta opp hotellet, og samstundes betala eigedomsskatt. Men etter møteverksemd med kommunen, bestemte han seg for å satsa på å rusta opp hotellet. Fredingsprosess: Mundal hotell opna i juni 1891, og er bygt i sveitserstil. Arkitekten som teikna hotellet er Peter Andreas Blix, og hotellet med 35 rom vert av mange rekna som å vera eit av dei best bevarte trehotella frå slutten av 1800-talet. I 2017 tok Moe initiativ til å freda hotellet. Sogn og Fjordane Fylkeskommune starta fredingssak i oktober i fjor, men denne er enno ikkje avslutta. I år fekk hotellet 2,5 millionar kroner frå Riksantikvaren for å setja i stand det dei kallar ei fredningsverdig bygning.Hotellet har vore stengt sesongen i år på grunn av renovering. Milliongjeld: Når Moe no har bestemt seg for å selja hotella sine, gjeld det også Tørvis hotell i Marifjøra.Moe tapte nettopp ankesaka i Gulating Lagmannsrett mot Luster sparebank og Luster kommune. Det betyr at hotellkjeda hans, Pure hotels, må ut med nesten 13 millionar kroner til Luster sparebank, og nær fire millionar kroner til Luster kommune. Moe sel også Nigardsbreen Lodge, og delar av Eidsbugarden hotell. Kjøpar: Sogn Avis har vore i kontakt med Ola Moe via sms, men han svarar ikkje på det me spør om. Kjøpar er advokaten Halstein Sigbjørn Sjølie i Moss. Han har tidlegare kjøpt Morgedal hotell i Telemark saman med kona Marianne. Dei pussa det opp for fleire millionar kroner, og opna det att sommaren 2017. Der har dei satsa på lokal historie og kunst. Sjølie har ikkje vore tilgjengeleg for intervju måndag ettermiddag. Den nye eigaren overtek hotella her i fylket i januar 2019.
Nytt håp for gamle hotell Av Sognavis Publisert: 20.12.18 LEIAR Nok ein gong blir det eigarskifte for lokale hotellperler som Tørvis i Marifjøra og Mundal i Fjærland. 15. januar 2019 tek ekteparet Marianne og Halstein Sjølie over hotella etter at investor Ola Moe bestemde seg for å selja. Den avgjerda kom Moe fram til etter eit knusande nederlag i Gulating lagmannsrett mot både Luster kommune og Luster Sparebank. Selskapet til Ola Moe, Scoop AS vart dømde til å betala gjelda si på over tolv millionar kroner i Luster sparebank. Dei må også ut med nær ein halv million kroner i forseinkingsrente inntil betaling skjer. Moe sitt selskap vart også dømt til å betala gjelda si på rundt fire millionar kroner til Luster kommune, og må på toppen av dette betala sakskostnadar for alle partar i lagmannsretten. Me kan dermed trygt slå fast at investoren frå Gjøvik ikkje akkurat dreg frå Sogn med flagget til topps. Her går han inn i ei rekkje med eksterne investorar som ikkje har lukkast med satsinga, verken på Tørvis eller Mundal. På Tørvis var det John Nyborg som tok over etter då 79 år gamle Per Bugge-Næss våren 2005. Det gjekk svært dårleg og allereie i desember same året reiste den engelske representanten for Nyborg frå bygda og hotellet. I mars 2008 kom så investor Rolf A. Wikborg på bana. Han både restaurerte og fekk sving på Tørvis. Gjennom selskapet Mountainfjord kjøpte han opp fleire hotell, mellom andre Mundal i 2010. Planane var store og spenstige, men i 2015 var det stopp også for Wikborg. Det var då Ola Moe kom på bana.Etter eit mindre vellukka mellomspel, med eksterne drivarar, har Mundal Hotell vore stengt dei to siste sesongane, medan Moe har drive med oppussing og renovering. Med den forhistoria desse to, tidlegare lokalt eigde, hotella har hatt dei siste 10-15 åra, må dei nye investorane finna seg i at me ventar litt før me kjem med dei mest optimistiske prognosane. Men me konstaterer at det i utgangspunktet ser bra ut! Bakgrunnen for det synspunktet er måten ekteparet Sjølie har gått laus på Morgedal hotell i Telemark på. Dei tok over det tradisjonsrike hotellet i 2016, og har brukt omfattande ressursar på å renovera hotellet før det opna att sommaren 2017. Ekteparet seier at dei gler seg til å gå laus i Sogn, og at dei har planar både i Fjærland og i Marifjøra. Utfordringane er sjølvsagt desidert størst for Mundal. Uansett, det er viktig for reiselivet at legendariske Mundal Hotell blir restaurert og opnar att snarast råd. Slik pilene peikar for reiselivet i regionen kan det visa seg å vera ei fornuftig investering av Exodus Holding, som familieselskapet til ekteparet frå Moss heiter. Me ventar og ser.
Av Wenche Schanke Eikum Publisert: 08.05.19 Selskapet Mountainfjord AS vart 5. mai tvangsoppløyst av Sogn og Fjordane tingrett. Rolf Wikborg kjøpte i 2008 Tørvis hotell i Marifjøra, og totalrenoverte det. Sidan oppretta han selskapet Mountainfjord, og kjøpte opp fleire overnattingsstadar. I 2010 vart Mundal hotell ein del av selskapet, og i 2011 Findebotn Gjestehus og Nigardsbreen gjesteheim. Wikborg har sidan selt seg ut av alle desse.Det har vore lite aktivitet i selskapet dei siste åra, og no er det altså tvangsoppløyst. Krav i buet må meldast til bustyrar Roar Berge. Første skiftesamling vert halde i tingretten i Førde 11. juni.
Av Jan Inge Fardal Publisert: 19.06.19 Det er ingen ende på visa om hotellperlene i Sogn. Tysdag denne veka varsla eigedomsmeklar Krogsveen at heile hotellportefølgjen med hotell som Tørvis i Marifjøra, Mundal i Fjærland, Eidsbugarden og Rondablik snart blir lagd ut for sal.Annonsa er meint som eit varsel til potensielle kjøparar, men det går ikkje fram når det blir opna for sal. Også Hotel Mundal kjem for sal att. Ikkje kontakt: Dette kjem overraskande på mange etter at Halstein S. Sjølie, saman med kona Marianne overtok Mundal hotell og Tørvis hotell i Marifjøra i januar.Marianne og Halstein Sjølie eig frå før Morgedal hotell i Telemark, som dei har brukt omfattande ressursar på å renovera. Dei har tidlegare sagt til Sogn Avis at dei gler seg til å gå laus i Sogn. Renovering: Medan Tørvis Hotel opna dørene i mai, har Hotell Mundal vore stengt for renovering sidan 2018. Mellom anna skulle taket fiksast. Den tidlegare eigaren, Ola Moe, bad om freding av dette hotellet, fylkeskommunen sette i gang fredingssak og Riksantikvaren har løyvd 2,5 millionar kroner til arbeidet med å ta vare på hotellet.- Det er ei stor utfordring å sette hotellet i stand, men det løyser me. Første etasje skal gjerast ferdig, og så er der fire romfløyer som det går an å pussa opp ein etter ein, sa Sjølie i desember i 2018. Kjøpte frå Moe: Ekteparet Sjølie overtok hotellperlene i Sogn frå Ola Moe etter at han lei eit knusande nederlag i Gulating lagmannsrett mot både Luster kommune og Luster Sparebank. Selskapet til Ola Moe, Scoop AS vart dømd til å betala gjelda si på over tolv millionar kroner i Luster sparebank. Selskapet må også ut med nær ein halv million kroner i forseinkingsrente inntil betaling skjer. Moe sitt selskap vart også dømt til å betala gjelda si på rundt fire millionar kroner til Luster kommune, og må på toppen av dette betala sakskostnadar for alle partar i lagmannsretten. Ikkje kontakt: Sogn Avis veit førebels ikkje kva som gjer at desse hotella no skal leggjast ut for sal att. Me har førebels ikkje lukkast i å få verken investor Halstein S. Sjølie eller tidlegare eigar Ola Moe i tale om den omtalte annonsa på finn.no. Men siste ord er garantert ikkje sagt i denne følgjetongen.
Eigarskifte: Det gamle trehotellet i Marifjøra har hatt hyppige eigarskifte dei siste åra, og det siste skjedde på førjulsvinteren i 2018. Halstein og Marianne Sjølie frå Moss kjøpte då hotellet av Ola Moe, i tillegg til Nigardsbreen Lodge, Mundal hotell, Eidsbugarden hotell og Rondablikk hotell. Men no er alle hotella nok ein gong lagt ut for sal, og det er selskapet til Moe, Scoop AS, som står som seljar. Ola Moe ynskjer ikkje å kommentera dette, og det har ikkje lukkast avisa å koma i kontakt med Halstein Sjølie. Det er sistnemnde som driv Tørvis hotell gjennom selskapet Exodus Holding, og den dei tilsette forheld seg til. God sommar: Drivar Katrin Bunte fortel at drifta går som vanleg. Dei tilsette har heile vegen fått løn, først av selskapet til Moe, og no Sjølie. Og dei står på til det beste for kundane.- Me held fram som før, og har hatt ein veldig god sommar, seier ho. Ho vil ikkje kommentera kven som eig hotellet og sel det, rett og slett fordi ho ikkje er sikker. Men uro kring eigarskap er ikkje bra for hotellet. - Eg har hatt 25 førespurnader om bryllaup til neste år. Fire har bestilt, nokre har kansellert. Me har også fått spørsmål om reservasjonar i 2021. Men uvisse hjelper oss ikkje. Pengetrøbbel: Det er meklarfirmaet M2 som sel hotella for Ola Moe og Scoop AS. - Det er eit dekningssal dette her. Kjøparen kunne ikkje gjera opp for seg, så difor har Moe lagt hotella ut for sal igjen. Det hevdar næringsmeklar Tommy Aaby, og seier interessa for hotella har vore stor. - Det har vore mange interessentar. Nokre er interesserte i to eller tre av hotella, andre er berre interesserte i eitt av dei, seier han som forklaring på at dei ikkje legg ut heile porteføljen slik det vart gjort sist. Dei har allereie fått bod på Nigardsbreen Lodge i Jostedalen. Lang soge: Tørvis hotell har ei lang soge med eigarskifte etter at Per Bugge-Næss selde hotellet våren 2005. John Nyborg tok over. Allereie i desember same året reiste den engelske representanten for Nyborg frå bygda og hotellet. I mars 2008 kom så investor Rolf A. Wikborg på bana. Han både restaurerte, og fekk sving på Tørvis. Gjennom selskapet Mountainfjord kjøpte han opp fleire hotell, mellom andre Mundal i 2010. Planane var store og spenstige, men i 2015 var det stopp også for Wikborg. Det var då Ola Moe kom på bana. Etter eit mindre vellukka mellomspel, med eksterne drivarar, har Mundal Hotell vore stengt dei to siste sesongane, medan Moe har drive med oppussing og renovering.Ekteparet Sjølie har vist at dei kan driva hotell gjennom Morgedal hotell i Telemark. Dei tok over det tradisjonsrike hotellet i 2016, og har brukt omfattande ressursar på å renovera hotellet før det opna att sommaren 2017. Avklaring: Ekteparet fortalde avisa at dei gledde seg til å utvikla både Mundal og Tørvis. Dei skulle satsa på lokal mat og lokal kunst. Og målet var å halda Tørvis hotell heilårsope. Men no er altså hotella for sal nok ein gong. På Tørvis seier drivar Katrin Bunte at dei har gjestar ut september, og nokre bestilte julebord. Utover det veit ho ikkje kva som skjer. Men eitt veit ho. - Mitt største ynskje for Tørvis hotell er fred og ro, og langsiktig eigarskap. Det trur eg er bra både for hotellet og lokalsamfunnet. Då trur eg Tørvis hotell kan verta ein stor suksess.
Av Wenche Schanke Eikum Publisert: 23.08.19 - Torsdag kveld fekk meklar inn eit bod på hotellet i Fjærland. Det seier meklar Tommy Aaby i meklarselskapet M2. Hotel Mundal kom for sal i byrjinga av august, saman med Tørvis hotell, Nigardsbreen Lodge, Eidsbugarden og Rondablikk. Strid om oppgjer: I desember 2018 kjøpte ekteparet Halstein og Marianne Sjølie alle desse hotella av Ola Moe. Dei fortalde om store planar både i Marifjøra og i Fjærland. Tørvis hotell har hatt full drift sidan sesongopning, medan Hotel Mundal har vore stengt for renovering.Men i juni varsla eigedomsmeklar Krogsveen at hotella kom til å koma for sal. Årsaka skal vera at Moe meiner Sjølie ikkje har gjort opp for seg.No har Moe skifta meklar, og hotella er for sal på nytt. Åtte millionar: Næringsmeklar Aaby kan ikkje seia noko om kven som har lagt inn bod på Hotel Mundal.- Det eg kan sei er at det er lagt inn bod på åtte millionar kroner. Og den som byr er ikkje lokal, eller frå nærområdet. Bodet står til klokka 16 på fredag ettermiddag. Etter det må Ola Moe avgjera om dette er noko han takkar ja til, eller om han avviser bodet. Aaby seier nei på direkte spørsmål om det er Halstein Sjølie som har lagt inn bod på hotellet.Det har vore fleire interessentar til alle hotella som no er for sal, og Aaby seier han hadde venta at det skulle koma inn fleire bod. Når avisa snakkar med meklar er det framleis mogleg å by. Avslo tidlegare bod: Nigardsbreen Lodge i Jostedalen er også for sal. Det er for tida ikkje i drift.- Det kom eit bod på 2,5 millionar for det, men det vart avvist, seier Tommy Aaby. Når det gjeld Rondablikk og Eidsbugarden er det litt anna type prosjekt som meklaren reknar med det tek lenger tid å selja. Han veit at Moe har vore i møte med fleire interessentar der. - Eg reknar med at dei tre hotella i Sogn vert selt først.Det er prosessar på gang også når det gjeld Tørvis, men det ynskjer ikkje meklaren å seia noko om.
Av Sigrid Nese Thue Publisert: 12.10.19 Det har kome inn to bod på Tørvis hotell i Marifjøra. Det stadfestar meklar Tommy Aaby i meklarselskapet M2 til Sogn Avis laurdag ettermiddag.- Fredag kom det først inn eit bod på 11 millionar og like etter kom det inn eit på 11,1 millionar.Kven som har lagt inn bod kan meklaren ikkje seia noko om på noverande tidspunkt. Mundal hotel: Fredag vart det kjend at Mundal hotel i Fjærland er seld for 9,5 millionar kroner.Meklaren kan førebels ikkje seia kven som er dei nye eigarane av det ærverdige hotellet.- Det kan eg dessverre ikkje av omsyn til kjøpar.- Kan du seie noko om kva tid det vil bli offentleg kven som har kjøpt hotellet?- Nei, det kan eg ikkje på noverande tidspunkt. For sal: Hotel Mundal, Tørvis hotell, Nigardsbreen Lodge, Eidsbugarden og Rondablikk kom for sal i byrjinga av august.I desember 2018 kjøpte ekteparet Halstein og Marianne Sjølie alle desse hotella av Ola Moe. Dei fortalde om store planar både i Marifjøra og i Fjærland. Tørvis hotell har hatt full drift sidan sesongopning, medan Hotel Mundal har vore stengt for renovering.I juni varsla eigedomsmeklar Krogsveen at hotella kom til å koma for sal.Moe skifta meklar, og hotella kom for ny ut på sal.Les også: Strid om oppgjer for Tørvis og Mundal Stor interesse: Meklar Aaby fortel om stor interesse for fleire av hotella.- Det har vore stor interesse både for Hotel Mundal og Tørvis hotell heile vegen. Nyleg vart også Eidsbugarden seld, men til kven og pris kan ikkje meklaren seia noko om.
Av Wenche Schanke Eikum Publisert: 18.10.19 Mosseadvokaten Halstein Sjølie som gjennom selskapet Tørvis Hotell Drift AS har stått for drifta av hotellet i Marifjøra har fått Finanstilsynet på nakken. Soga kring Tørvis hotell vil inga ende ta. Mange hadde von om ei god framtid for hotellet, då advokaten frå Moss, Halstein Sjølie og kona Marianne, kjøpte Tørvis hotell av Ola Moe. Slik gjekk det ikkje. Manglande oppgjer: Sjølie betalte ikkje for hotellet, og Moe la det på ny ut for sal. I mellomtida har Sjølie vore ansvarleg for drifta, og hotellet har vore drifta som normalt heile sesongen.Ulovleg rolleblanding: Og no har Sjølie hamna i hardt ver gjennom anna hotellverksemd han driv.Moss Avis skriv 16. oktober at Sjølie er under lupa til Finanstilsynet etter at ein klientkonto vart tappa for 15 millionar kroner. Sjølie selde Haukeli hotell i 2018 og var sjølv eigedomssmeklar for salet, utan å oppgje at han samstundes var eigar gjennom eit holdningselskap. Dette er ulovleg. Finanstilsynet peikar også på at salet ikkje vart gjennomført i samsvar med kontrakten, fordi eit pant ikkje vart innfridd og sletta, skriv avisa. Millionane som forsvann: Moss Dagblad omtalte også saka 11. oktober. Der siterer dei Finanstilsynets vedtak der det står at Sjølie sende kopi av ei kontoutskrift som dokumentasjon på at det var penger nok på hans klientkonto til å dekkja det som var uteståande til pantehavaren i hotelleigedomen.Kontoutskrifta viste 15 millionar kroner, medan det i røynda kun var 177.000 kroner på klientkontoen per 12. juli i år. Då klientkontoen vart sjekka på nytt 17. september 2019, var kontoen nesten tom for pengar; 495,42 kroner sto då igjen.No har Tilsynsrådet for advokatvirksomhet sett Sjølie under forvaltning, og Finanstilsynet har vedteke avvikling av eigedomsmeklingsoppdraga til Sjølie, skriv Moss Dagblad.
Ventar fleire bod: Det har ikkje lukkast Sogn Avis å koma i kontakt med Sjølie for å finna ut om dette får konsekvensar for drifta av Tørvis hotell i Luster kommune. No er hotellet vinterstengt, og for tida ligg det inne eit bod på 11,1 millionar kroner som varer til fredag 25. oktober. Meklar Tommy Aaby i meklarhuset M2 seier han reknar med at det kjem inn fleire bod på hotellet før den tid.
Av Keth Øren Publisert: 28.10.19 Bodet vart ikkje akseptert av seljar. Det var kome eit bod på 11,1 millionar kroner for Tørvis hotell i Marifjøra, og det vara til fredag 25. oktober. - Bodet vart avslått av seljar, og me jobbar no med andre bod, seier meklar Tommy Aaby i meklarhuset M2.Han vil ikkje seia noko meir om kvifor bodet vart avslått. Neste frist er 5. november, og det ligg per no inne to bod på 11 millionar. - Det er også gode moglegheiter for fleire bod, seier Aaby.
Av Renate Sæle Publisert: 08.11.19 I følgje NRK Østfold har advokat Halstein Sjølie har erkjent straffskuld. Siktinga går på underslag av 30 millionar kroner. Økokrim har gått til aksjon mot kontora til advokat Halstein Sjølie. Han har gjennom selskapet Tørvis Hotell Drift AS stått for drifta av Tørvis Hotell den siste tida. Sjølie betalte ikkje eigar Ola Moe for hotellet og Moe la det på ny ut for sal. Hotellet har vore i ordinær drift heile sesongen i år. Etterforskinga skjer etter ein anmeldelse frå Finanstilsynet. Dei reagerte mellom anna på at Sjølie hadde vore eigedomsmeklar ved eit hotellsal der han sjølv var seljar. NRK Østfold skriv vidare at Sjølie skal ha teke ut pengar frå klientkonto. Det er på bakgrunn av anmeldelsen frå Finanstilsynet at det er oppretta etterforsking av saka. - Han har erkjent straffskuld i henhold til siktinga. Siktinga går på 30 millionar, men det er ok riktig å seia at storleiken på beløpet er noko uklart, seier Vegard Aaløkken til NRK Østfold. Aarløkken er forsvarar for advokat Sjølie, som ifølgje NRK har vore i fleire avhøyr hjå Økokrim dei siste dagane.
Av Wenche Schanke Eikum Publisert: 12.11.19 Det er Fjordane Eigedomsmekling i Førde som no prøver å selja hotellet på vegner av kreditorane.
Samstundes prøver tidlegare eigar Ola Moe å selja Tørvis hotell gjennom advokatfirmaet M2. Han avslo for ei tid tilbake eit bod på hotellet på 11,1 million kroner, i følgje meklaren.I salsannonsen til Fjordane eigedomsmekling ligg hotellet no ute med ein verditakst på 13 millionar kroner. Resultat av dom: Det er dagleg leiar Ole Rune Døskeland i Fjordane eigedomsmekling som styrer tvangssalet. Det har ikkje lukkast Sogn Avis å koma i kontakt verken med Døskeland, eller meklar Tommy Aaby i meklarhuset M2. Stein Heggdal er advokaten til Luster sparebank. Han seier tvangsalet no er eit resultat av dommen i Lagmannsretten. Der vart Ola Moe og selskapet Scoop AS dømde til å betala gjelda si på over tolv millionar kroner i Luster sparebank. Dei må også ut med nær ein halv million kroner forseinkingsrente inntil betaling skjer. Scoop vart også dømt til å betala gjelda si på rett under fire millionar kroner til Luster kommune, og må også betala sakskostnadar for alle partar frå lagmannsretten. Dommen; Tvisten som vart avgjort i Lagmannsretten stod mellom anna om sanering av gjeld til selskapa bak Tørvis Hotell. Eigar Ola Moe meinte han hadde oppfylt sin del av avtalen med banken, og at dei hadde krav på gjeldssanering.Luster sparebank på si side meinte Moe ikkje har halde seg til vilkåra banken sette for refinansiering og ettergjeving av gjeld. Bank og kommune fekk medhald i retten for sitt syn.I dommen frå Lagmannsretten vart handlingane til Moe karakteriserte som «både vilkårsbrudd og klart illojal opptreden». Retten slo fast at praktisk talt alle viktige føresetnadar for lovnaden om gjeldssanering ikkje var oppfylt av Moe. Tvert imot låg det føre eit klart grunnlag for å trekkja tilbake både lovnadane, eller erklæra heving. Har ikkje betalt: Sidan dommen har Moe prøvd å selja hotellet, utan å lukkast. - Moe har fått sjansen til å prøva å selja sjølv. Men det tok for lang tid, så no tek me grep for at kreditor skal få inn pengane sine, seier advokat Heggdal.Det er altså no to partar som prøvar å selja Tørvis. - Me skal prøva å få til eit intitativ til å samla salet hjå Døskeland. Prosessen med tvangssal, trumfar uansett salet til M2, seier Heggdal.
Av Sigrid Nese Thue Publisert: 29.11.19 Ragnhild Solheim og Bøye Einang har kjøpt Eidsbugarden. Det skriv Avisa Valdres.Eidsbugarden vart lagt ut for sal saman med Hotel Mundal, Tørvis hotell, Nigardsbreen Lodge og Rondablikk i byrjinga av august i år.Tidlegare i haust fekk Sogn Avis bekrefta at Eidsbugarden var seld, men meklar Tommy Aaby i meklarselskapet M2 ville ikkje seie kven som hadde kjøpt det og prisen dei hadde gjeve.No er det klart at Ragnhild Solheim og Bøye Einang frå Valdres overtek eierskap og drift av Eidsbugarden med opning frå sommaren 2020.Tidlegare i haust vart det kjend at Ola Moe har kjøpt attende Hotel Mundal.Det har også kome inn bod på Tørvis hotell på 11,1 millionar kroner, men dette skal ha blitt avslege. No er det starta tvangssal av hotellet i Marifjøra.
